波仔近況

最近波仔失蹤咗成個月, 我哋同隔離屋姨姨都好擔心佢...  加上離屋姨姨話最後一次見波仔時, 發現佢個嘴腫得好犀利, 所以準備咗一啲藥俾佢, 點知一路都無再見佢嘞.   上個星期, 我哋同隔離屋姨姨講開波仔, 大家都好鬼擔心, 同做咗啲心理準備... 佢唔再返嚟...  姨姨話佢係未奄嘅貓公, 所以野性一啲, 好易撩打交或俾人打.  姨姨試過收養佢,  但佢唔肯囉~~ 只係定時定候返嚟食飯.  真曳曳~~

喺波仔失蹤期間, 連 ah Be 都同我講, 波仔可能唔再返嚟, 佢已經死咗lu~~~ 真係擔心死人...  

今日早上, 卒之見到波仔返咗嚟, 一睇! 陰公豬囉!!! 瘦咗咁多... 個樣咁病嘅??

再望真啲... 個背脊受咗傷??  好彩姨姨有藥俾佢食, 希望佢快啲好番啦~~


波仔, 你要快啲好番呀~~ 要乖乖啦~~~ 有咩事, 一定要返嚟呀!! 知唔知道呀??

小小義工日@賽馬會復康中心篇(2)

上星期六 (14/4/2012) 我哋一家又去探訪老友記嘞~~ 開叔、胡婆婆、儀婆婆等各人都身體健康, 人人龍精虎猛!! (THANKS GOD).  班老友記見到我哋都好開心架~~  今日無狗醫生, 所以主要由各人(包括老友記) 輪流表演唱歌, 老友記們都好踴躍表演獻唱. 有幾個朋友開始煲腐竹蛋糖水. 

ah Be 一共唱咗五首歌 ~ 轉轉轉綠燈、校歌、親愛的老師、快樂的一天開始了、那誰 (爆!!)

Ah Be 間場地獻唱完五首歌之後, 埋位食糖水~~~  佢真係唔多客氣... 食咗一大碗+1.5隻蛋...... 食量驚人......


今次同老友記歡聚兩個小時.  臨走前, ah Be 揸住相機同公公、婆婆影相 (個人私隱問題, 不便公開佢哋嘅容貌), 個傻仔仲影自拍照, 超 hyper~~
嘩~~ 好大個黑眼圈呀~~~ 小朋友, 瞓多啲啦~~

自備啦啦球~~ 不過臨場唔肯用嚟表演, 只係用嚟玩~~  激死人~~


我哋由3:30 玩到 5:30 走.  初步約定下次探訪會改為 outing, 帶老友記衝出院舍~~ yeah~~ 期待中~~~

ah Be 眼中超爸的三大優點~~

又到我家三口嘅低B對話...  大家忍一忍... (*´ｪ`;)  話說今日中午我哋出發去踩單車途中, 我玩鬼 ah Be 話佢知我哋無帶單車~~ 佢嚇到呆咗... (有無咁單純呢...) 於是超爸要 ah Be 講出爸爸三個優點... ah Be 諗咗一吓就開始答, 每答一個優點前, 佢都會好認咁諗一諗...

1. 爸爸好叻、好強壯, 佢係我哋屋企最大隻、最強壯嘅人, 佢成日都保護我哋架...又拎得起架單車, 爸爸係全世界最強壯嘅人 (宇宙最強??!! 越講越失控...)

2. 爸爸係世界上煮嘢食最叻嘅廚師, 因為呢爸爸煮嘢食好好味、好 yummy~~ 搓麵粉又叻, 整麵包又叻, 煮麵又叻, 揸車又叻, 乜都叻 (有無咁誇張呀...)

3. 爸爸星期一至五返工好辛苦, 放假要帶我玩, 真係好辛苦~~  好攰架...  所以呢... 我星期六、日要帶佢去街.... 行下~~  (開始越講越遠... 唔知講咩...)

超爸聽到, 梗係好冧啦~~ 我仲見到佢偷笑添

多謝收看呢段極無聊嘅低B對話~~ 多晒!!

K3親子體操滙演

ah Be 幼稚園生涯最後一次 ｢親子體操滙演｣喺今日 ~ 3月23日舉行 ,  今次表演, 兩班K3學生傾盡全力, 排練兩個月, 日練夜練, 廢寢忘食 (真係連茶點時間都縮短咗好多架...), 每日放學都半條命咁返嚟... (因為同一時間要彩排親子體操+畢業禮...)

我同超爸兩點七到禮堂, 表演啱啱開始~~ 由K1學生表演, 真係好得意+搞笑~~ 好蝦碌~~

ah Be 班就坐埋一邊睇師弟妹演出... (其實係不停傾偈... )
 

發現咗 mamemo~~ 揮揮手~~

扮御林軍乎~~~

排隊~準備表演

列隊進場之後, 排好位置開始~~~ 不停跳足四分幾鐘, 由四方形跳到幾個圓形, 再變花形+十字形, 不停轉花式.  一跳完, 掌聲如雷 其他老師都同K3老師握手讚好  我都差啲感動落淚...

到親子部份~~ 大家都係掛住影... 影... 影...

K3X 大合照~~ 真失禮... 迫唔到入去影, 只好舉高隻手亂影~~ 咁都俾我影到 Be san~~ 

嘩然! 呢張相好嘔呀~~ 見唔見到右邊有隻扮花嘅細路呀??

今次嘅禮堂設計有小小心思喎~~ ah Be 班係自畫象旗幟, 知唔知邊個係 ah Be??


▼
▼
▼
▼
▼
▼
▼
▼
▼
▼
▼
▼
▼

就係佢嘞~~ (由底數上第二行, 由右邊數起第四個)

神奇麵包機~~

登~~ 登~~ 登~~ 凳~~ 神奇麵包機已經喺星期二晚 (13/3) 著陸我家~~ 
  

超爸想喺日本買麵包機好耐, 最後知台灣都有出, 仲要平過日本. 所以叫台灣朋友幫手買, 然後有朋友去台灣玩, 順便幫我哋攞返嚟.  真係要多謝遊台灣的朋友~~

神奇麵包機真身~~ 好靚仔~~

 

買齊材料 + 變壓器. 開工~~ 放入高筋麵粉

奶粉 + 糖

加牛油 + 水

核桃 + cranberry


左邊可放乾果類配料、右邊放酵母粉.  然後關蓋.  選功能 + 選烤色同預約時間~~ 明早8點焗好~~

B B 出世啦~~

有料包~~


無料包~~

個包嘅質地唔錯~~ 好鬆軟~~ 無其他奇怪化學材料~~ 好好味呀  

(ah Be 都話好好食, 要追加~~)  大家有無興趣試吓呀??

米奇老鼠妙妙屋

今晚, ah Be 嚟我公司接我放工, 但我又未走得... 我老闆搵咗啲史前玩具(佢囝囝細個玩嗰啲) 出嚟俾ah Be 玩. 應酬一下佢~~  登... 登... 登... 凳~~ 就係呢頂帽嘞~~ 

個傻Be 一戴上米老鼠帽之後, 好似鬼上身咁, 嘟起個嘴. 扮米老鼠把聲, 口中唸唸有詞咁唱 : 開心玩! 開心笑! 米奇老鼠!  齊齊在這裡一起... (米奇老鼠妙妙屋首主題歌...) 真係名副其實嘅~~ 老翻米老鼠~~ wakakakaka~~~  爆笑~~~ 好彩我有錄底咗, 等佢大個自己睇番一定超爆笑!!  佢好鍾意頂帽, 成晚拎住/戴住唔放手!!

睡相

呢個星期每晚都喪開OT... 無十一點半都無得走... 可憐嘅 ah Be 要每晚喺婆婆家呆等... 佢又唔肯喺婆婆家覺覺豬.  唯有叫超爸盡量早放工返去湊佢啦 (其實 ah Be 都唔多想超爸湊佢, 不過好過無啦~~ 脆脆地... 要咗佢...)  呢個星期, 佢成個樣變晒落晒型, 成隻熊貓咁... 個黑眼圈又大, 眼肚又大... 真係慘慘豬...  鬼咩! 晚晚等我等到十二點... 囝. 你唔好等媽咪啦!! 早啲瞓啦, 心痛死我啦.... 

星期二晚, 佢等我等到忍唔住瞓咗... 我返到屋企開晒燈, 一邊拍佢一邊搖佢一邊講 : ｢bb, 媽咪返嚟啦! 錫啖先瞓啦!! ｣  好無人性耶~~  嘻嘻!!  之但係佢真係無反應囉!!  跟住忍唔住影咗張相.   望真啲... 嘩!! 大個仔咗咁多嘅?? 個身咁長嘅?? 有成110 cm 高 (我諗...) 仲生鬚添...

尋晚十點幾, ah Be 打電話俾我, 一邊喊一邊問我幾時帶佢返屋企... 喊到死死下, 最後仲發爛渣話唔睬我 ( 眼瞓癲...) 

我即答: ｢好吖, 咁你以後唔好搵我.｣講完即刻收線!   我最憎啲人恐嚇我架嘛!!（￣へ￣）眼瞓咪瞓, 唔明點解要發脾四呢?? 我真係嬲架!!  不過, 嬲還嬲, 都係要繼續做野架...  隔咗三分鐘, 個衰 Be 打返電話嚟, 喊住講 ｢sorry 媽咪... 我下次唔會發脾氣... 你原諒我啦, 好唔好??｣(重覆講咗好幾次...)  我真係怕咗佢 (阻住我做野)... 於是, 是是但但咁原諒咗佢, 佢亦好合作地收聲唔再喊, 然後收線.