K2 功課進度

經過一個幾星期嘅功課練習, 小Be 已經消化咗佢要做功課呢個事實!!!  仲可以做完功課再溫習返當日或之前學過嘅字. 

由上星期一 (20/9)起, 小Be 會喺婆婆屋企自己做功課.  番到屋企由我檢查功課!  嘩!! 頭幾日啲字寫做到打大風, 肉酸到不得了... ... 有啲肉酸到我忍唔住叫佢擦咗佢再重寫.  起初, 佢都唔係好肯擦架!  扭嚟扭去!  當佢見到老師改完佢啲功課之後...  佢即刻勤奮咗!!!  不但樂於擦走寫得唔靚嘅字, 仲對自己寫出嚟嘅字體好有要求, 筆劃歪咗少少, 佢都會擦咗去再重寫.  佢話唔想老師俾交叉佢喎!!! 希望佢可以 keep 住呢個對自己嘅要求啦!!

老師對字體有一定要求.  如果寫得唔好, 老師會用紅筆劃正確條線, 去糾正學生嘅字體. 

例子一 : 劃線唔直或唔貼虛線

例子二 : 寫到個字型, 但唔貼底線

例子三 : 字型唔相似

經過我一輪嘅教授, 小Be 寫字比之前寫嘅端正 (雖然仲有好多擦膠痕... 請見諒)

小Be, 加油!! mamemo 支持你!!!!

新家庭成員 ~ 琴琴

上星期一, 易老師急call 通知我, 有人急讓 yamaha 二手琴.  經易老師上門睇過實物, 琴琴本身都幾好, 開價算 ok, 抵買!! 再經易老師還價, 比開價平多13%!! 成交!!! 上星期六即刻送嚟我哋屋企 (唔係我心急呀!! 係賣家趕送佢走咋).

琴琴都幾大座, 諗到頭都爆... 唔知放喺邊到好...  最後... 放喺走廊... 真失禮...

點解買琴琴?? 因為我想學琴, 加上我都安排小Be 學琴.  如果學琴, 我哋又無咩時間同佢去琴行練琴, 就等如無用.  所以我就決定平平哋買個二手琴, 方便學同練嘛...  易老師會11月正式教我哋兩母子!! 好期待呢日嘅出現呀!!!

齋菜@K2中秋party

話說上星期中秋節正日, 小Be 要帶一樣中秋應節食品回校, 跟同班同學開中秋party一齊分享.  我同婆婆講, 柚子健康啲, 不過太重啦!! 帶一個月餅啦!!  殊不知... 小Be 私自要求帶佢好愛食嘅｢齋菜｣返學校同同學分享...

婆婆即刻打電話俾我... 我緊係話唔得呀!! 唔可以帶齋菜返學校, 啲齋菜會變壞架! 小Be 哦咗一聲跟住講 bye bye.

放學時, 超爸發現書包有一盒齋菜...

超爸頭上立即有十萬個為什麼??!! 

到我放工見佢哋嗰陣, 小Be 同我講佢最後帶咗齋菜返學校開 party!! (唔係嘛!!) 不過, 老師唔俾佢攞出嚟分享 !! 要小Be 帶番返屋企. 

老師仲寫手冊, 留言叮囑我哋唔好再帶齋菜回校... 真火羅...

真係一個好嘅教訓俾佢!! 等佢下次唔好自把自為...

人肉大鬧鐘

發達啦!!發達啦!! 今日公司放假一天!! 最興奮嘅係小Be!!! 點解??  睇睇下面嘅對話就會知喇!!!

佢一朝早叫我起身, 佢邊拍我邊話 : ｢媽咪, 你快啲起身啦! 唔起身, 你老闆會鬧你架!!! ｣ 

媽咪 : ｢今日老闆唔會鬧我, 佢今日放假, 所以我都唔使返工!! 不如一齊瞓多陣啦!!｣

小Be : ｢點解老闆今日放假?? 去邊呀??｣

媽咪 : ｢唔知佢去邊呀! 全公司放假囉... ｣ ( 成個人醒晒!!! 唔使瞓啦...)

★★★★★★★★★★★★★★★★★★

小Be 好開心我可以送佢搭校車同接佢落校車.  喺我哋坐車出去食 lunch 時, 佢又有以下奇想 :

小Be : ｢媽咪, 不如下次叫老闆放八日假啦??｣

媽咪 : ｢吓! 點解呀?? ｣

小Be : ｢你可以陪我返學嘛... ｣ (此時小Be 臉向窗望街, 奸笑中...  )

媽咪 : ｢吓! 唔得喎!!  老闆放八日假唔關媽咪事架喎!! 公司唔會跟老闆放咁多日假架喎!!! ｣

 小Be : ｢哦... 咁放兩日囉, 好唔好?? ｣ (小Be 講時豎起兩隻指 ->)

媽咪 : ｢好... 好... 我安排一下... ｣

食完 lunch, 送佢上校車, 見到佢一臉滿足... 我個心都好安慰.  (幾時我可以唔返工, 自己照顧返佢呢??? 唉... 我唔返工, 婆婆唔使食咩!!!)

放學後同佢去買嘅 ｢飛忽｣ ~ Donut 做下午茶!! 佢今日真係好開心... 全日笑咪咪

K2生活對mamemo 的轉變...

自小Be 升上 K2 之後, 對我 mamemo 都有好大影響架...  真係日日趕到甩轆...  我最大嘅轉變係 ~ 每一日都要趕19:30 嘅校巴出城, 再轉地鐵返屋企!!  盡量喺21:00 前帶小Be 返到屋企!!  返到屋企之後, 咋咋淋開書包, 睇睇是日功課係乜東東... 然後 turbo 腳做功課... 做完再溫習一啲生字.  要喺22:00 飲奶、刷洗, 然後覺覺豬!! 

唔知點解... 而家啲教育制度咁奇怪... 只係著重功課嘅數量... 而唔係著重質素... 對小朋友同家長嚟講... 真係好吃力!!!  小朋友嘅得著係食 ｢填鴨｣... 只係死記課本內容, 都未識消化, 又要原文嘔番出嚟... 真係唔知教統局同局長搞乜東東??? 而家嘅教育制度仲衰過我以前讀書嗰時...

好彩嘅係... 小Be 唔係讀什麼名校... 每日只有一樣功課, 循序漸進, 又淺入深.  所以勉強都接得住...  如果每日有幾樣嘅話... 我真係要辭職歸家跟功課... (我都話我係一個懶惰嘅媽咪架啦!!! 做多少少就嘈喧巴閉!!)

小Be 暫時都 ok 做功課, 如果隻字寫得肉酸啲, 佢都會主動要求擦咗個字再寫過.  希望佢 keep 住呢個自動自覺嘅態度啦!!  

K2 功課... (更新)

小Be 自從升咗K2 之後, 佢個書包每日多咗幾本書 (K1 只需帶手冊).  多咗嘅書包括 : 一本中文及一至兩本功課簿

逢星期一、四 ~ 中文生字練習, 每日寫一個生字, 一版二十個字, 喺學校寫十個, 屋企寫十個, 仲要填埋顏色

小Be 除咗要學識寫之外, 仲要學識讀 (普通話發音)

逢星期二 ~ 英文大楷生字練習, 一版約十五至二十個字

個S字, 對小朋友嚟講... 真係幾難寫...  

逢星期三 ~ 數目字練習

個2字都好難寫囉...

原本逢星期五 ~ 係英文小楷生字練習

腸病毒

Be 中咗腸病毒呀!!!　

真係大近視!!! 小Be 返咗兩日學就出事喇!!! 就中咗腸病毒呀!!!!

事源... 上星期六半夜三點幾 (9月5日星期日清晨), 我聽到小Be 大喊之聲... 原來個傻豬仔企喺走廊到大喊... 我問佢咩事? 佢話肚痛+急屎... 我埋去拖佢兼摸一摸佢個 pat pat

大近視!!!  瀨咗!!!! 我咋咋淋抱佢入洗手間... 佢繼續放煙花!! 超爸即刻彈起身清潔地板、掉內褲、洗小Be 啲睡褲... 仲要檢查床仔.  咦!!! 無事喎!! 小Be 好叻仔, 佢知醒去厠所架!! 只係忍不住... 佢啲 "C" ... 係噴射式咁瀉架!!!  我諗換轉係我... 都唔易忍... (*´ｪ`)  成晚小Be 不停起身去厠所邊釣魚台邊瀉... 但都無整污穢張床喎!! 只係整污穢褲仔咋!! mamemo 真係要俾你 10x good 

第二日朝早, 小Be 堅持上畫班.  跟住帶佢去睇何醫生, 何醫生話最近啲腸病毒好肆虐... 要小心! 小心!! 佢仲預計小Be 要瀉多三日添... 不過, 唔會開止瀉藥俾小Be 食! 要瀉晒啲菌出嚟先得.  我同意呀!! 喺等攞藥期間, 小Be 要光顧港鐵站洗手間兩次, 進行煙花表演...

連續瀉咗三夜四日, 每小時瀉一至兩次! 夜晚都係咁起身瀉... 真係人都癲... 仲要釣魚式坐厠放煙火...

小Be 就係食呢啲藥去抗病毒架!! 支抗生素醫青色鼻水嘅...  

小Be 好乖呀!! 點瀉、點辛苦都好, 無扭計, 叫食藥就食藥.  仲邊食藥邊同我講 : ｢媽咪, 食晒啲藥就會好番架! 知唔知道!｣  其實小Be 最唔開心、願意嘅係要重著已經丟低咗兩年嘅片片... 我都唔想架!! 雖然佢知道要放煙花, 但控制唔倒... 不停換內褲.  所以最好係著片片囉!! 乖仔, 媽咪真係錫晒你呀!!

到星期四康復咗好多!! 不過仍然要停課, 到下星期一先復課啦!!  纖體後嘅小Be, 後面睇 ................................................

左側面睇 ....................................

右側面睇 ......................................

正面睇, 係咪瘦咗好多呀?? 我諗瘦咗4-5磅... 臉豬登無晒肉...