康復進度

Be 嘅傷勢差不多康復嘞

*** 多謝大家關心 ***

*** 特別嗚謝 ***

D姨姨嘅"油" + 膠布

28 姐姐嘅食療 + 藥用意見

文姨丈嘅洗傷口指導

*** *** ***

傷後第二晚 (21/10/2013)

要幫 Be 搣去臉上兩塊大膠布... (喺醫院貼嘅...)

一塊喺眼底 (約1.5寸高 x 2.5寸濶) 有部份膠係貼喺傷口上...

另一塊喺眼皮... 貼喺眉毛上...

要搣走嗰兩塊膠布

可以講得上係 ｢滿清十大酷刑｣!!

文姨丈一見完 Be 臉上嘅膠布

已經講明會超 ~ 痛...

*** *** ***

Be 好有見地咁同我講 :  ｢媽媽, 不如我瞓咗你至幫我摵, 我咁爛瞓, 咪唔知道痛囉! 我唔會醒架!!｣

既然你咁講

就試下你個提議啦!!

但事實並唔係咁囉...

*** *** ***

等Be 瞓著咗

先起眼底嗰塊... (紫色圈位置)

先用濕棉花敷面

希望起塊膠布容易啲

但係都無用...

唯有一邊搽油

一邊慢慢搣出嚟

由左至右 (眼尾至鼻邊)

一路搣

Be 一路叫...

搣到一半

超爸入嚟話 : ｢一次過啦! 長痛不如短痛...｣

(我真係無眼睇...)

"嚓" 一聲!!

有個瞓著咗嘅細路即時彈咗起身大喊... 

佢痛到滿臉通紅... 嗚... 嗚...

喊到癲咗 (對眼係一直緊閉...)

真係睇見都痛...

最後

只係搣咗眼底嗰塊膠布

第二日(22/10/2013)下午先搣眼皮嗰塊

睇下! 幾靚仔~~

後生仔即係後生仔

好得好快 ~~

(28/10/2013) 睇下! 八日咋!! 已經回復原貌~~

只係臉上多咗幾撻粉紅皮

(Be 稱之為 ~ 嫩肉... )

我的志願 (突破版)

一路以來

Be 的志願都係

地鐵車長、巴士司機或的士司機...

今日

佢同我講咗一個 ~ 突破性嘅我的志願...

Be : ｢媽媽, 我而家星期二、四小息唔得閒食小食呀!! 我要去回圖書館睇書呀!!｣

我 : ｢咁叻! 去圖書館睇書??｣

Be : ｢係呀!! 我要睇多啲書, 因為我要做一個數學家吖嘛!!｣

我 (吃驚!!) : ｢咁犀利!! 你想做數學家??｣

Be : ｢係呀!! 我要努力啲! 我要創一啲 "法" 出嚟!!｣

我 : ｢咩 "法" ??｣

Be : ｢即係好似2乘2等如4嗰啲法!!｣

我 : ｢哦... 嗰啲係叫 "數式"/ "方程式", 唔係 "法" 呀!!｣

Be : ｢明白!! 仲有呀! 你第日有腦退化症, 我可以訓練吓你吖嘛!!｣

(數學家同腦退化症有咩關係??!!)

我 : ｢吓... 即係點??｣

Be : ｢你第日老咗有腦退化症, 我會送你去老人院, 不過你唔使驚, 你唔係住喺老人院, 我會放工後嚟湊你返屋企.  你只係去老人院接受訓練.  如果你學得唔好, 啲姑娘可能會鬧你, 不過你唔使驚架!! 佢哋你為你好架咋! 你要俾啲心機學呀! 知唔知?? 返都屋企我都會教你架!! ok?? 你唔使驚, 我一定會照顧你架,媽媽... ｣

我 : ｢哦... ... ...｣ (無言... )

筆姿

 Be 原是左撇子

起初一直用左手做所有事

拿筆/ 筷子姿勢好好、好靚

但到K2

老師硬性要 Be 用右手拿筆

(我投訴過好多次... 都無用...)

起初, Be 寫字/ 食飯

左右手共用

漸漸右手變得力大

最後變了右手拿筆/ 筷子

但筆姿/ 字體, 拿筷子姿勢/ 夾餸能力大不如前...

筆姿真係... 好爛...

一直想矯正佢筆姿

但佢仲細個

講唔明...

直至兩個星期前

"的" 起心肝要佢改筆姿

佢終於明白點揸筆嘞... (感淚...)

仲要好快咁改咗筆姿

只係約一個星期就完全改咗!!

之前筆姿

現在筆姿

嚟緊會執埋佢拿筷子姿勢

希望又係好快可以改到啦~~

而家嘅Be 仲有好多嘢都係用左手

一. 拿球拍

二. 拿剪刀

三. 大部分活動都係左手出先

三口子家庭近照

我同超爸由結婚、懷孕到產子

都無影結婚、懷孕、產子家庭照

(唔想若干年後見到自己個'娘'樣... 驚會忍唔住... )

*** *** ***

Be 四歲嗰年

破例影咗一輯

主要原因係

好友俾咗兩張優惠劵我

只需$500 大元

就可以揀15張相走

見咁抵! 要試吓

(其實好友俾咗好幾次我... 唔想再浪費... 說穿了... 骨子裹都係 C奶一名... 貪小便宜... )

所以我要求超爸俾 Be 影一輯

主角係Be
('娘'佢... 唔係'娘'我... keke)

我哋兩老只係同佢影咗幾張相咋...

最後... 當然唔只跌 $500 咁簡單啦~~ 

*** *** ***

三年後嘅今日

七歲嘅 Be 自畫一張家庭照

我覺得畫得好似嘅全家幅

超愛... (因為畫得我靚咗) wakaka 

個傻Be 話因為係一家人

所以佢要加副眼鏡俾自己 

全家都好有殺氣... 條眉粗過關刀!!! (6塊紫菜...)

(註 : 我同佢係母子裝嚟架!!)

*** *** ***

四歲影集~~

隻衰嘢, 真係交足戲架~~

如果唔係... 我哋點會跌錢吖~~~

豁達 ~ 一笑置之~~

經心理輔導後

Be 對自己嘅外型已經唔再介意嘞~~

今朝等位食早餐時

有一家三口超近距離坐著

望住見我家三口

小朋友：點解哥哥塊臉咁嘅？

父母：哥哥跌親囉！你都要乖呀！唔好曳呀！

母 : 行街街時... （下刪百字）... 如果唔係呢... 就會撞傷塊臉啦!

父接 : 仲有呀! 搭電梯時...（下刪百字）... 如果唔係呢... 仲傷呀! 塊臉呢會... ...

我當刻諗... 

稚子無知...

點解兩個大人咁唔用腦??

兜口兜臉講?? (雖然唔係講人壞話...)

呢刻 Be 嘅聲音拉返我返嚟

Be笑笑口：媽媽, 講緊我呀？

我：係呀！

然後 Be 聳聳肩, 鬼馬地笑一笑~~

一笑置之~~ 

Be你大個仔啦！

同學關係

Be 由細到大

返學表現都係好靜靜英英

(係咪估佢唔到呢?? keke)

上幼稚園時

佢投入校園生活嘅表現

更加可以用｢抽離｣嚟形容...

而家諗返轉頭...

當時佢嘅行為可以形容為 ~ 疑似｢自閉症傾向｣...

好彩佢身邊總有幾個同佢玩得埋嘅同學

溶化佢

*** *** ***

自上小學後

佢喺學校都係好循規蹈矩

依佢講

好多時小息食完小食後

佢都係坐喺度 ~ ｢發呆!!｣

(佢真係用"發呆"嚟形容...)

小一時

佢有三、兩個傾得埋嘅同學

小息會一齊捉棋、傾吓、交換吓小食

不過, 喺小一時

佢都試過被杯葛

因為佢太循規蹈矩地玩飛行棋

一定要骰仔摘 '6' 先可以起機

唔肯妥協喺同學自訂嘅2、4、6 可起機

所以被同學認定係一個麻煩的人...

我就變身心理輔導員

小息只得十至二十分鐘

如果摘骰仔一定要6 先可以起機

唔夠時間玩架 ... (下刪百字...)

有時要變通下

只要大家一齊同意修改咗嘅遊戲規則係可以嘅...

重要一點係...

朋友唔使多

知心友幾個就足夠

(我都話... 我怪怪地架啦...)

*** *** ***

但到小二後

Be 兩個好同學已經唔同班...

暫時只有一個傾得埋嘅同班同學

所以... 只係同呢個同學多啲交流

其他時間, 佢好多時都係坐埋一邊 ~ ｢發呆!!｣

希望遲啲佢可以搵多一兩個傾得埋嘅同學啦!!

愛心大使

Be 尋日一落校車

好開心咁同我講佢被選為 ~ ｢愛心大使｣

我 : ｢咩嚟架?｣

Be : ｢即係 caring ambassador｣

我 : ｢我意思係有咩職務??要做啲咩??｣

Be : ｢有同學無返學, 我要同佢抄手冊、執功課｣

我 : ｢哦... 都幾好喎! 你要俾心機做好呢份工呀! 

寫字要靚啲, 如果鬼劃符, 同學就唔知要做咩功課啦!｣

Be : ｢媽媽, 我知道啦!｣

我 : ｢你係點樣選出嚟架呢??｣

Be : ｢老師問想做愛心大使嘅同學請舉手, 然後求其選咗我同xxx.｣

我 : ｢你點知老師係求其選??｣

Be : ｢佢望咗我哋一陣, 然後講名...｣

Be 自上小一後

都好想做班長、行長等工職...

不過, 好多時班長都係要品學兼優生先做到

小一時只係做過一次行長

問佢點解咁鍾意做??

佢話好鍾意幫人執頭執尾同埋擦黑板 (我細個都好鍾意擦黑板)

今次有一個公職對佢嚟講係好事

令佢對學校有多啲歸屬感

事事上心啲

加多啲鼓勵!!!

希望佢打好呢份工!!