無聊 IQ 題

有時嘅 Be 好似好醒目 (一定係唔使用腦嗰時...)

有時嘅 Be 好似好C蠢 (一定係用腦讀書嗰時...)

有時嘅 Be 好似好老成 (一定係講無謂嘢嗰時...)

有時嘅 Be 好似好單純 (一定係唔夠轉數嗰時...)

天才與白癡... 真係一線之差...

*** *** ***

早兩日

Be 擰咗張紙出嚟

話佢自己設計咗條 IQ 題

叫我同佢一齊玩

當我一睇 

囝, 呢條唔係 IQ 題

係考眼力題

Be 叫我搵出左右圖嘅3大不同之處。。。( ☉_☉)　

其實... 左右圖係完全唔同喎....

不過

我唔可以即時拆穿佢架嘛

佢會唔開心架...

我都要交吓戲俾佢嘅~~

老老實實...

要搵出嗰 3大不同之處真係有啲難搵...

1. 蓋掩

2. 罐身

3. barcode no.

Be : ｢媽媽, 你好勁呀!! 咁快睇到!!｣ 

原本小朋友有思想係好簡單

好容易滿足

咁都叫 ｢好勁呀!!｣

wakakakaka 

我的媽媽

喺媽媽屋企

見到爸媽嘅結婚相簿

幾十年後嘅今日

我仍覺得本相簿好靚、好精緻 (變黃除外)

呢位小姐就係我嗰位靚媽媽嘞~~

係咪好靚呢??

(可惜我唔似佢...)

佢著緊嗰件婚紗同頭紗係媽媽自己做架~~

佢以前係喺婚紗店做婚紗架

我細個係喺婚紗/頭紗堆度長大

媽媽做嗰間婚紗店係喺禮頓道、跑馬地口

個店名好似叫 ~ 玫瑰夫人 (如無記錯)

*** *** ***

同場加映

我哋十表兄弟其中七位兒時合照

十表兄弟其中一位仲未出世

我喺 whatsapp 群組分享後

大家不停研究 ~ 時間、地點、點解無咗兩件??

仲有一個問題 : 就係除右三白衫白褲嗰位識笑之外, 其他人口黑臉黑??

而家睇返

真係好搞笑!!

吃齋日

媽媽一年有超過三分一日子係食齋嘅

(但唔知點解都仲係好燥底...)

遇著吃齋日

我哋一家都會同佢四圍去食齋

(我哋成家都愛吃齋~~)

今次超爸又諗到新地方

(佢成日諗食齋新地方架)

地點 : 佐敦 ~ 六榕仙館

圖中 : 三餸一羹/湯套餐 (齋鹵味除外) ~ $230 咋

味道仲好 

時日棄嬰 ~ 小豆

平時唔多鍾意食飯嘅佢

都食到話好好味~~ 

最後我哋係叫咗一個套餐、兩碟齋鹵味、一碟羅漢齋炒麵 + 一碗粟米粥~~

盛惠 $400 大元~~

都好抵吓喎!!

媽媽好滿意呢間齋店嘅食物質數

讚不絕口

不速之客

最近三個星期

我家厨房出現一位不速之客...

次次都嚇到我死...

第一次遇見

當我洗緊菜時...

左邊眼角有嘢閃過...

第二次見面

已經要正面交鋒...

就係... 洗完菜... 擰起飯煲準備洗米之際

佢喺我手邊飛彈出嚟...

第三、四次就喺我右邊眼角跣出嚟...

真係次次都嚇得我半死...

今朝...

佢又嚇咗我一大跳...

就係... 我正要做早餐俾Be 時

隻衰嘢飛起出嚟嚇我...

(我無戴眼鏡都見到佢... 真係好驚囉...)

我就嚟俾佢嚇死啦...

佢係邊個??

咪就係 ~ 啊簷生囉!!
(簷蛇 ~ 四腳蛇)

其實我又唔係好怕啊簷生

只要唔掂到佢

我就唔係好驚

只係有啲頂唔順佢成日失驚無神跳出嚟...

呢條簷生真係好得意架

佢出沒地點好近窗邊

但佢係都唔走架喎...

仲有呀!!

佢條尾唔同一般簷蛇咁貼住牆行架...

係半豎起架...

真係好奇怪...

飛出嚟時

條尾仲會擺吓擺吓...

好似油漆廣告嗰條咁架...

腦退化症

Be 越嚟越識好多嘢, 攞口仲越大越衰...

尋晚, 無記嘅節目~東拉西扯講腦退化症

開場白係咁嘅 : 無記性?? 唔好以為好小事, 分分鐘係腦退化症嘅先兆... ... ...

喺呢個時候

有一個好似八婆仔嘅細路

由厠所走出嚟... 

碌大對眼、O住個嘴、縮起個膊, 指住我話 : ｢媽媽, 原來你有腦退化症呀!! 唔使驚, 我會照顧你架!!!｣

我當刻真係想...  當無生個呢個仔呀!!!!!!!!!

點解... 佢讀書時 IQ 零蛋... 非讀書時 IQ 200 ????!!! 

*** *** *** *** *** ***

有日

有個細路喋喋不休、不停發問同一條問題

令我抖唔到氣...

我忍唔住答佢 : ｢我都話係xxxxxxx 囉!!!｣

Be : ｢媽媽, 做咩囉囉聲?? 唔好句句都加個囉字得唔得?? ｣ ←_←'

我 : ｢okok... 下次唔加囉字囉!!! ｣

** (近呢兩個月, Be 叫我 ｢媽媽｣... 仲要係好輕聲、好溫柔嗰種...)

*** *** *** *** *** ***

有日我洗完頭

未有索乾水、梳好就出咗廳

Be 拖返我入厠所

示意我坐好

然後同毛巾同我抺頭

跟住梳頭再吹頭

佢嘅動作就好似佢小時候

我同佢沖完涼

幫佢抺頭、身、吹頭咁

好搞笑

而家仲有無幫佢沖涼??

無啦!! 今年起佢已經自己沖涼

大個仔啦嘛~~

(我唔係嗰啲唔捨不放手嘅家長...)

普通話退步了...

Be 喺三年幼稚園生活裡

最大得著係操得一口流利純正普通話

捲脷捲得好好聽

上咗小一之後

校園生活由普通話世界回歸廣東話世界

只有上普通話堂同中交課喺用普通話

始終上課堂聽同講嘅普通話都比較生硬

唔係平時生活說話嗰種音調

好彩Be 個底都算打的好少少

讀課文時佢會自己喺度調音

算無咁生硬

不過, 都係比以前差咗啲啲...

呢個差咗啲啲... 

正正係我擔心嘅...

當初不斷反複思量嘅原因...

K 好 定 C 好....

重溫Be K2 時唱的歌

快樂的一天開始了~~

學踏兩轆單車

今日朝早同Be 喺屋企做功課+溫習

真係唔明點解... 一有多一日假期

就有... 九萬幾個評估、默書同閱讀報告

真係讀極、做極都唔完... 

三點幾去食下午茶

鬆一鬆

跟住去咗踏單車~~

Be 已經七歲

仍然未學兩個轆 (一年至踏一次單車...)

我同超爸決定

呢個秋天同佢踏多啲單車

要佢學識兩個轆~~

Be 好緊張咁推架四個轆去改裝

拜拜四個轆

兩個轆... 爸爸好辛苦...

邊有人側身踏單車架... 

Be 整體表現都ok 嘅

開車上腳尚可啦!!

有時都自己平衡到

我估學多一兩次應該學識