湊細佬的安排...

話說尋晚搭地鐵時, Be 又充滿感情、甜漏漏、冧冧地摸住我個肚 ~~ 腩... 一邊錫、一邊講... : ｢BB 乖乖, 哥哥錫錫~~ 你快啲出嚟啦~~ ｣

又同細佬講野...  其實都無... 佢係咪恨細佬恨到發燒... 有妄想症... 

我 : ｢吓! 你又同細佬講野?? 如果真係有細佬, 你會唔會唔理佢? 唔鍾意佢架??｣

Be : ｢嗯... 我唔會唔鍾意佢架! 我會好錫佢同照顧佢架!｣

我 : ｢你點照顧佢先?｣

Be : ｢嘩! 如果佢出世我咪七歲半?｣ (突然啲數學咁好嘅...???)

我 : ｢係呀! 真係有七歲半喎!! ｣

Be : ｢我會同佢換片片、抱佢、同教佢讀書...｣

我 : ｢真係一個叻哥哥~~｣

Be : ｢我大個咗會揸早班巴士, 朝早六點鐘準備早餐俾你地食, 下午一點返嚟同你哋食午飯, 五點放工會返嚟做家務同煮晚餐.  媽咪, 我會照顧你哋架~~｣

我 : ｢哦! 咁你大個咗, 細佬嗰時幾多歲呀??｣

Be : ｢嗯... 都有十幾歲啦!!｣ (一講細佬, 真係數學都好咗喎~~ )

我 : ｢好啦! 好啦!! 再試吓細佬會唔會嚟啦~~ 唔一定有架~~ 知唔知??｣

Be : ｢知! 好嘢~~ 我有細佬~~ ｣

 我 : ｢都話唔一定有咯~~ ｣

Be : ｢知嘞! 知嘞!! 媽咪加油!! ｣

(點解佢會識講... 媽咪加油???)