靚仔??!!

星期日Be 傷臉後

Be 好介意自己個容貌

成日講唔想返學、唔想去呢、唔想去路...

我同超爸不停同佢講

唔使介意人哋點睇

樣係唔重要

一個人最緊要係心哋、內涵好

又俾佢睇吓我哋臉上嘅疤痕

之後

佢先開心啲

(講真... 喺街上 

真係好多奇異目光向住佢

好多大人係眼定定咁望佢...

又有好心人問咩事搞成咁...)

*** *** ***

星期一放學

我開緊門時

Be 突然幽幽的講 (眼中有淚) : ｢媽咪, 我咁靚仔, 點解會搞成咁架??｣ ←_←'

我即時反眼 + 答 : ｢其實... 你真係唔可以講得上係靚仔囉...｣

(真係忍唔住加咗個 ~ 囉字...)

Be 答 : ｢唔係喎, 我覺得係靚仔喎...｣

我答 : ｢真係好難講得上靚仔... 我覺得用型會好啲, 算啦! 意外之嘛, 會好返嘅!!｣

(費事太傷佢心...)

Be 答 : ｢哦... ... ...｣(*´ｪ`;) 

*** *** ***

上上星期五

老師派咗本英文圖書

應該係要做閱讀報告

我見都有派閱讀報告工作紙

於是攞咗張之前影印落嘅紙

快快手手星期日睇埋兼做埋

上星期中

老師真係要佢哋交報告

隻衰嘢返嚟同我 : ｢媽咪, 真係要交閱讀報告, 不過點解我哋唔用學校啲黃色工作紙做??｣

我 : ｢吓! 一定要用黃色工作紙?? 使唔使抄返落老師派嗰張紙度??｣

(明明老師話可自行影印...)

Be 好氣定神閒+做住功課答 :

｢冷靜啲, 你諗多咗嘞... 唔使重做｣

我 : ｢衰仔, 玩我...｣

佢喺度偷笑...