窩心的餅碎!!

尋晚放工接小Be 時, 佢一見我, 就送上食物盒 + 對我講 : ｢媽咪, 呢盒餅乾係我俾你聽朝做早餐食架!!｣

我 : ｢嘩! 好開心呀!! BB, 多謝你呀!!!｣

小Be : ｢你記得食呀, 知唔知道!!｣

我 : ｢知道, 多謝你呀!!!｣

我今朝開蓋一望 

 ~~ 餅碎!!! 其實啲餅乾係小Be尋日學校啲茶點嚟架, 不過佢食唔晒啲餅乾, 所以攞返嚟同我分享, 但又攞得唔小心, 變咗餅碎... 雖然只係餅碎. 但我都覺得好窩心囉...

小小義工日@2011

一年一/二度嘅義工日又到嘞!! 我哋同心家相約一齊食 lunch, 然後一齊出發!!!

去到中心, 等緊收 briefing!! 玩陣先!!

收到個服務對象 file 啦!! file 面有探訪指引 ~

仲有義工秘笈添呀!!!

最後係有服務對象嘅資料, 今次係有五位對象 (上幾次係三位, 今次多咗兩位)

又係呢個 backdrop, 只係日期唔同咗...

今次個禮物包多咗少少嘢... 就係一包仔 ~ 米...

因為今次禮物包多咗米同多咗兩位服務對象, 所以都幾重下!! 因為超爸有少少腸胃炎, 佢都嚟參與, 所以我幫佢攞兩大袋!!

禮物包中的禮物

ah Be 都有幫我攞架... 不過實在太重嘞... 好快俾返我!!!

今次要去嘅目的地有少少遠... 所以我哋決定坐車!!

兩父子尋路中~~

約兩個鐘頭, 我哋探訪完四户, 五位老人家.  見到佢哋開心, 我哋都好開心!!  五點幾離開中心, 我哋去咗九龍城逛咗一陣, 然後去咗食晚飯.

ah Be 碟面隻熊貓係咪好似 ah Be 呢?? 我覺得好似呀!!!

感想 : 今次服務對象嘅生活條件 (根據眼見生活環境) 比上幾次的老人相對富裕, 但係從閒聊中知道佢哋嘅心靈都係好寂寞... 子女長大, 各有生活, 可能一星期都見唔到一次面... 有位婆婆甚至一年先同女見面幾次 (因為個女已經移民, 所以每年個女返港見媽媽, 都好有心啦..)  每次講起子女, 佢哋就會好開心架!! 我哋素未謀面, 見到我哋嚟探訪, 佢哋都好熱情同開心, 攞啲飲品、小食出嚟俾我哋食! 好好招呼架!! 希望佢哋生活愉快同身體健康!! 

巧遇 TV Buddy~有下文呀!!!!

話說上幾篇blog 寫過喺 4月17日, 小Be ｢巧遇 TV Buddy｣... 仲有TVB 週刊個攝影哥哥幫小Be 同 TV buddy 影咗張相嘅事... 早兩日突然醒起呢件事!!!

靈機一動, 喺度諗... 要登喺 TVB 周刊嘅話... 應該係呢一期喎!!! 咋咋淋去搵吓先!!

咦!! 點解封面女郎俾人遮咗一半嘅??

揭到唔知第幾十頁, 卒之搵到有三版印有 ｢資料由客戶提供｣ 嘅活動報告 (post event coverage), 入面搵到1/16版嘅TV buddy 相, 仲有手指尾甲咁大嘅小 Be 頭出現!!! 嘩!! 發達啦!! 無端端見報呀!! (又自娛中... 手指尾甲咁大... 都懶開心...)

▼放大啲睇吓!! 同我影嗰張一樣樣架喎!!

我帶本書返屋企俾小Be 睇, 小Be 直情睇唔到自己個頭, 只係話 ｢TV buddy 呀!! ｣.  到我哋指俾睇佢個頭時, 佢問 : ｢媽咪, 點解呢本書有我嘅?? ｣   因為呢幾版印有 ｢資料由客戶提供｣, 所以我將呢篇 blog 列入｢廣告篇｣!!! wakakakaka (又在自娛中... 我啲妄想症無得救架啦!!)

好友 ~ 林永星!!

以下內容涉及驚嚇情節, 敬請留意!!

今朝, 我刷洗完返房, 見到床上有一粒又圓又大嘅鼻C...

同一時間, ah Be 都見到我發現咗呢粒鼻C!!! 我同佢鬥快搶嗰粒核突嘢!! 

最後係 ah Be 擰起咗...

mamemo : ｢咩嚟架?? 快啲掉去洗手間, 然後洗手!!  ｣

ah Be : ｢唔得架!! 唔掉得佢架!!  ｣

mamemo : ｢點解唔掉得?? 咁污穢!! 快啲掉!!  ｣

ah Be : ｢唔得架!! 佢係我個好朋友嚟架!! ｣

mamemo : ｢吓! 好朋友?? 邊個係你好朋友?? 叫咩名? 喺邊度嚟?｣

ah Be : ｢佢係我好朋友, 叫林永星, 喺我鼻哥度跌出嚟!!｣

mamemo (激到就嚟嘔血!!) : ｢吓林永星??!!如果你再唔掉, 我會打電話俾邱老師, 問佢係咪佢介紹你哋認識, 好唔好??  ｣

ah Be : ｢唔使... 咁... 我帶佢去厠所啦!!｣

mamemo : ｢快~~｣

我喺房聽到佢沖厠同洗手嘅聲, 然後佢入返房同我講 :

ah Be : ｢mame, 林永星已經沖咗落厠所返番星球嘞!!｣

mamemo  : ｢咩話!! 返番星球?? ｣

ah Be : ｢係呀!! 佢返咗自己個星球囉...｣

mamemo : ｢咩星球呀?? ｣

ah Be : ｢火星 ｣ 好細聲又好尷尬地回答...

K2 親子體操表演

上年因公事無出席小Be K1親子體操表演... 真係內疚咗成年!!! 今年死都要出席!! 我去到學校禮堂時,高年班已經開始表演.  搵咗小Be 好耐都見唔到佢, 急到我死...

直至廣播宣佈小Be班~K2X準備表演, 我先搵到個位坐定定. 到小Be班出場, 各人企定, 我先搵到佢咋!! 好彩佢嘅企位好近我個坐位!!  小Be 表演初期都四圍望搵我, 到我叫佢, 佢先專心繼續表演!!  下面嗰幾張相, 係親子跳舞時影嘅.

小Be 話佢手上嘅拉拉花好難拎上手, 只可以用三隻手指夾住個拉拉花.

佢知我到場睇佢表演, 佢真係好開心呀!! 不停笑!!

一表演完, 老師立即收起拉拉花, 到放學時至放入書包攞番屋企

大冬瓜跌落床

小Be 由細到大, 人生三件事 ~ 食、瞓、拉都非常之好, 完全無問題 (touch wood...)!! 特別係瞓覺, 每每入睡後, 佢會進入忘我境界!!!

例子一 : BB 時, 喺姨媽家中, 小Be 可以睡在麻雀枱旁瞓晏覺, 約一個半鐘頭 (各姨婆同公公牌照打!!)

例子二 : 上年(2010)年廿八零晨三點零, 超爸居然喺入睡中嘅小Be 隔離揼+電批上書架同櫃!!! 但小Be 仍然係瞓到扯鼻鼾!! 真係有少少佩服佢!!

昨晚小Be 又發生爛瞓事件!! 就係 ~ 大冬瓜跌落床!!! 話說昨晚我陪小Be 喺我張床到覺覺豬 (我瞓前先移動佢去佢自己張床!!). 佢瞓著咗之後, 我出咗廳睇電視.  睇咗一陣, 我聽到 boom 一聲!!! 有巨物跌咗落地呀 !!

咋咋淋入房一睇...

OMG!!! 點解呢個小朋友跌落地都唔醒架!! 我唯有抱起佢左檢查、右檢查, 捽捽佢個頭邊問哩度痛唔痛、嗰度痛唔痛, 佢只係迷迷糊糊答我唔痛就無再理我嘞!! 

到今朝我同佢講番件事, 佢堅稱係佢自己爬落床! 唔係爛瞓跌落床!!! 真係一個要臉子的人!!!

超爸離開咗我哋??!! 啋!啋!啋!

今日下午超爸起程去沙巴開會, 要下星期二至返嚟.  所以我喺早兩日開始, 我耐唔耐提 ah Be 要乖乖陪多啲超爸, 因為爸爸會去沙巴開會, 嚟緊有幾日爸爸會唔喺屋企, 見唔到爸爸, 要下星期二先見到架!! ah Be 完全收到我嘅意思!!

到咗今晚, 飲完奶佢... 倦意正濃... 開始發眼瞓癲之際... 突然雙眼通紅... 一對水汪汪的眼睛望住問我... 

ah Be : ｢媽咪, 爸爸已經離開咗我哋... ｣

mamemo :  ｢吓... ｣ (唔知點回應之際...)

ah Be : ｢點解爸爸唔會再返嚟嘅?? 佢唔要我哋嗱?? ｣

mamemo :  ｢啋!啋!啋! 爸爸去咗第二度開會, 呢幾晚唔返嚟瞓之嘛!! 唔係唔再返嚟呀!!｣ (忍唔住大笑

)

ah Be : ｢哦!!｣ (破涕而笑!!)

mamemo :  ｢快啲上床瞓覺, 你真係好眼瞓!!｣

跟住佢乖乖上床, 九秒九瞓咗!!!