有人被罸~~

最近小Be 好鬼曳, 講極唔聽... 激到我日日生蝦咁跳!!! 叫佢做一樣野起碼要叫三次(我覺得我喉嚨好快有事囉...)、次次話佢佢都駁嘴駁舌...、真係阿崩叫狗越叫越走, 真係激到我死... 

今日收到姐姐報訊, 小Be 今日對婆婆不禮貌 (有少少動手), 加成日撩鼻哥!! 吓!! 發生咁大件事!!! 我同超爸即時火燒心啦!!  我哋一路都無同佢講嘢, 佢都好醒, 一路默默地抆我衫腳跟住我返屋企.  返到屋企亦好乖巧地放低書包, 攞功課出嚟俾我核對, 我話啲字寫得唔多靚, 佢仲攞擦膠出嚟擦晒全部重新再寫過, 仲寫得好靚吓喎!!  不過一事歸一事, 我家家法係 ~ 做錯事一定得要受到懲罰.

我同超爸問佢點解要對婆婆不禮貌, 佢話佢唔想, 係一時個心好嬲所以出手(咁都得??), 佢話已經即時同婆婆講對唔住.  我哋梗係話唔得啦! 如果佢再控制唔到自己, 我哋要帶佢睇醫生.  我哋又問佢點解成日撩鼻哥, 佢話佢個鼻成日好痕, 所以忍唔住撩 (佢嘅鼻敏感好嚴重).  我再重申一次鼻痕 "練"吓個鼻就得嘞, 唔使成日撩, 如果唔係就變咗大鼻窿.  佢點頭話知道...
講完道理之後, 我就攞出我嘅秘密武器 ~ 滕條.  打咗佢撩鼻哥嗰隻右手食指三下, 同罪行嚴重 (傷人)啲嘅左手五下... 佢都算奀皮, 打三下手指唔喊, 打左手都係打到第四下喊咗兩聲... (其實真係幾痛下架...) 跟住爸爸罸佢面壁思過, 企咗約二十五分鐘.  希望佢經過呢次嘅大懲罰之後, 會知驚, 肯改過, 唔再重複犯錯啦!!  (其實... 我都係冒險罰佢架... 真係唔明點解佢做錯事, 我打佢手板, 都有機會俾人告虐兒...)