波仔

我屋企附近有一隻流浪貓, 佢一啲都唔似流浪貓, 佢嘅毛色好潤澤, 毛紋好靚. 佢由開初好驚我哋到而家已經唔驚我哋 (起碼唔會走先...).  每次我同ah Be 經過, 我哋都會同佢傾吓偈.  ah Be 仲話想帶佢返屋企添.  不過, 已經有一主人家每日俾貓糧佢食, 嗰主人家嘅姨姨仲試過帶佢入屋住添, 但佢好快就走返出嚟, 我諗佢都係鍾意做流浪貓多啲, 所以我同ah Be 講貓貓已經俾姨姨收養咗.

喺尋日, ah Be 同我講, 要同佢改個名, 咁我問佢要改咩名, 佢話隻貓貓好似個波咁 ~ 肥嘟嘟, 不如就叫 ｢波仔｣ 啦!! 好啦! 你鍾意啦!!  自此, ah Be 每次見到呢隻流浪貓, 佢都會波仔前、波仔後咁叫佢架!!

波仔係咪好靚呢, 一啲都唔似流浪貓呢??  其實佢以前仲靚仔架, 不過佢半年前受過一次重傷之後, 佢雙目嘅眼神差咗好多.  嗰次好彩有嗰個姨姨俾抗生素佢食, 佢先好得返... 其實如果姨姨唔俾抗生素佢食, 我諗我都會帶佢睇醫生...