最近睇過一位媽媽的札記 ~ 講述最近兒子上學情況, 兒子由活潑可愛變成一個受了驚的小男孩... 睇第一、二篇還可以... 但越睇越唔對路... 越睇越忟... 媽媽見到囝囝上學豪哭而有心痛的感覺係好正常, 小朋友有異常行為實屬正常, 一家大細扶老攜幼陪小朋友上第一天學都好正常, 重新考慮應否繼續上學等問題都屬正常... 但係到咗第四、五、六、七天情況仍然一樣或更加惡劣... 問題大多出於父母本身... (雖然我只有一個 ah Be, 本人覺得有一啲基本嘅湊仔技倆都係大同小異, 再配合小朋友嘅獨特性格而酌量調節)
喺呢種情況, 父母本身都需要調節一下... 連父母都覺得返學會令小朋友身心受挫, 小朋友亦會感受得到父母想發, 更加對上學產生恐懼. (*小朋友係一張空白嘅紙, 佢嘅一切思想、行為, 都係由大人(父母) 灌輸, 佢嗰張紙嘅內容、顏色係由大人填上) 至於行為異常, 第一、二晚, 小朋友應該出於本能反應, 但如果父母只將問題放大而沒想到正面地嘗試將問題解決, 小朋友亦會跟隨大人一樣將問題放大, 當然陰謀啲諗, 小朋友有撒嬌嘅空間. 另外, 小朋友與家長在校分離時有持續痛哭的情況... 我可以理解囉... 依我所看(札記 ), 每天都有一簇人 (至少三人) 送小朋友上學, 換轉係我... 我都唔捨得分開啦... 成家人送我走, 好似係出國咁, 有排都唔見面, 更何況係一個兩歲小朋友呢?? 佢嘅感受一定比我哋大人大好多倍囉... 正面啲咁睇, 會唔會由一個家長送小朋友上學會好啲呢? 起碼小朋友唔會每日都有快將被遺棄的感覺...
現今BB奶粉營養過盛, 已經唔會有蠢鈍仔出現, 個個都 IQ過 100. 其實佢哋約一歲起已經有自己思想、識分好或唔好, 如大人好明確指示, 佢哋已經知道幾時可以同幾時唔可以. 小朋友只係一張白紙, 好多時佢哋嘅認知/ 對與錯都係由大人灌輸俾佢哋. 當然有啲小朋友係會惡教啲, 但亦要好快矯正佢唔正確嘅思想同行為, 有時用適當嘅｢惡｣/｢體罰｣ (打一兩下手板仔咋, 唔好話我虐兒呀!!), 小朋友會記得呢個教訓. 有時要硬心腸對待小朋友, 令小朋友明白何謂對/ 何謂錯.
到小朋友兩歲, 已經好大個, 除咗識分對/錯, 仲識得睇大人嘅眉頭眼額. 如果大人懂得教導佢, 佢必定學得到 (無十成都有七、八成). 相反, 如果大人仲當佢係 BB, 咩都聽晒佢話或仍然過度溺愛, 繼續用不同藉口溺愛佢, 小朋友反會 "食" 住大人, 因為佢已經知道只要自己表態要什麼, 大人就會給予... 大人就會被小朋友牽著鼻子走, 再用不同原因去掩飾小朋友嘅行為, 例如, 佢係受軟唔受硬, 所以我要循循善誘佢架. 佢平時唔怕生寶架, 其實佢好乖, 只係你哋唔明白佢咋. 其實係大人自己喺度製造緊 ｢港孩｣囉...
呢個年代, 大部分家長都係中產知識份子, 有自己處事想法/方法. 唔容易接納人別人 (或老師) 嘅意見, 因為佢哋相信世上無人及自己更了解自己個仔/女. 有時何不放鬆點, 聽聽他人意見呢??!! 無壞喎... 唔接受別人意見唔緊要, 大人本身咁主觀, 點樣可以教育好小朋友?? 現今社會成日投訴 八、九十後如何不濟... (投訴人大多是 ｢中產知識份子｣) 咁呢班中產知識份子有無諗過佢哋自己都喺度製造緊一群千禧後嘅 ｢超級港孩｣??
至於｢怪獸家長｣呢個銜頭並唔係由自己決定, 係由其他人 (老師或有交過手嘅人) 嚟封銜嘅. 講咗咁耐... 大家千萬唔好對號入坐, 我唔係針對任何人, 只係睇完嗰幾篇札記有感而發, 不吐不快 (呢啲咪就係多管閒事, 抵唔住頸囉...), 同埋警惕自己不要做｢怪獸家長｣啊... 知易難行... 我會記住我要粗養 ah Be!! 我要佢成為非一般嘅｢千禧後｣!!!
沒有留言:
張貼留言